Еден од поталентираните голмани кои оставија одличен впечаток во натпреварите во младинските категории, Алекс Трајановски, ја продолжува својата кариера во редовите на Вардар.
Трајановски, кој има само 15 години и настапува на голманската позиција, е производ на ракометната школа Младост Ресен, а во иднина ќе настапува за младинските категории на „црвено-црните“.
Своите почетоци ги имаше кај тренерот Сандре Темелковски и две години учествуваше на ракометниот камп „40х20“, каде што имаше можност да работи со Ице Соколески, Златко Даскаловски, Бобан Блажески…
Доказ за неговите квалитети е тоа што беше посакуван од неколку суперлигашки и прволигашки клубови, кои го гледаа како засилување за своите младински селекции.
Тренерот од Малме, Мартин Нихлен, кој беше дел од тренерскиот тим на ракометниот камп „40х20“ во 2022, му препорача на Трајановски да се проба во скандинавската земја.
Младиот Трајановски ги има сите предиспозиции да стане одличен голман, а преминот во Вардар за него претставува чекор напред и потврда за неговиот потенцијал.
Со тоа тој ќе добие можност да се кали во посилна конкуренција, да напредува, но и да стекне драгоцено искуство кое ќе му помогне во понатамошната кариера.