Овче Поле Славјански Универзитет им се врати на победите во Првата лига, откако пред својата публика триумфираше над Стружанка со 32:18 во натпревар од 9. коло и се израдува на петтата сезонска победа.
Избраничките на Илија Бетувски на полувреме заминаа со предност од плус шест, 13:7, во вториот дел Стружанка имаше повремени блесоци, намали на 16:13, но домаќинот во последниот дел ги казни речиси сите грешки на гостинките и дојде до убедлива победа.
Најефикасна во победничката екипа беше Анастасија Сентовска, која зад своето име запиша дури 15 погодоци. Голманката на домаќините Дона Маркоска имаше околу 18 интервенции. Јана Петреска и Вања Маџовска беа најефикасни во Стружанка, двете ракометарки постигнаа по четири погодоци.
Тимот од Свети Николе во следното, 10. коло ќе гостува во Скопје кај Шампион, додека Стружанка е слободна.
Прва женска лига, 9. коло, резултати:
Овче Поле Славјански Универзитет – Стружанка 32:18 (13:7)
Атлетик – Деспина 29:16 (13:5)
16/11, 13:30, Јехона – Шампион
Ѓорче Петров 2 – слоб.