Искусната Мери Гичева, поранешна репрезентативка на Македонија, посветено придонесува во развојот на женскиот ракомет во Прилеп. Со своето богато, вклучително и интернационално искуство, успешно им го пренесува знаењето и вештините на помладите членови на ЖРК Деспина.
Во претходните сезони таа покажа дека за неа годините се само број. Иако има 41 година, игра како во најдобрите денови, а нејзината пасија и посветеност се пример за помладите.
Изминатиот викенд, во натпревар од 20. коло од прволигашката конкуренција, тимот на Деспина триумфираше над Стружанка со десет гола разлика, 25:15. Гичева на овој натпревар, за околу 19-20 минути игра (колку што и настапи), постигна пет погодоци, а со последниот стигна до бројката од 100 гола во тековната сезона и моментално е на второто место на листата на стрелците.
До крајот на сезоната, тимот на Деспина ќе одигра уште шест натпревари.