Машката кадетска репрезентација на Македонија го одигра првиот натпревар против домашни екипи, како дел од новата програма за унапредување и развој на младинскиот ракомет во нашата земја.
Составот предводен од селекторот Горан Кузманоски и неговиот помошник Митко Стоилов загуби од комбинираниот состав со играчи од Алкалоид и Мулти Есенс со 34:30 (14:15).
Резултатот беше во втор план, а селекторот Кузманоски ја искористи можноста да ја провери моменталната подготвеност на дел од репрезентативците.
Најефикасен во тимот предводен од тренерот Филип Глигоров и неговиот помошник Елена Златановска беше Стефан Ѓорѓиески со девет погодоци, шест постигна Ангел Кленковски, пет додаде Тома Симоновски, а по четири реализации имаа Дамјан Богоевски и Стефан Матески.
Во репрезентативниот табор се истакнаа двајцата играчи на Мулти Есенс – Бобан Поповски и Стефан Ѓорѓиевски со по пет погодоци.
Покрај натпреварите против домашни екипи, кадетите ќе учествуваат на меѓународниот турнир „Трофеј Карпати“, во Романија, а потоа ги очекуваат квалификациите за пласман на Европското кадетско првенство 2026.
Македонија за ривали ги има репрезентациите на Луксембург, Финска и Грција, а домаќин на квалификациските натпревари ќе биде Луксембург.
На 31 октомври Македонија игра против Финска, на 1 ноември против Грција, додека во последното коло од квалификациската група Д ќе се сретне со домаќинот.
По квалификациите, кадетската репрезентација ќе продолжи со тест натпреварите против домашни екипи.