По изненадувачкиот пораз на Вардар Неготино во Штип од Текстилец, раководството на клубот и Пепи Манасков, кој беше ангажиран пред стартот на сезоната, одлучија да се разделат, а според информациите на „Спортска Димензија“, нов тренер на неготинци ќе биде Игор Котевски.
Поранешниот репрезентативец добро ги познава поголемиот дел од играчите на прволигашот, бидејќи во сезона 2023/24 го предводеше Вардар Неготино во суперлигашката конкуренција.
Во својата тренерска кариера беше на клупата и на Радовиш, Јуниор КВ, Куманово, Голден Арт, Металург, Бутел Скопје…
Вардар Неготино покрај киксот во Штип, беше поразен и на гостувањето кај Младост Богданци, па неготинци со шест бода моментално се наоѓаат на четвртата позиција на табелата.