Ракометарите на Мулти Есенс ја продолжуваат битката за пласман во суперлигашката конкуренција, откако во натпревар од 11. коло од Првата лига славеа над Вардар Неготино со 34:29 (16:15).
За неготинци ова беше трет сезонски пораз, по оној од Младост Богданци и Текстилец, па така избраниците на Игор Котевски ќе имаат многу тешка задача до крајот на првенството.
Мулти Есенс сега има 20 бода, исто колку и лидерот Младост, но тимот од Богданци допрва треба да го одигра натпреварот со Аеродром.
Младиот состав од Автокоманда заслужува честитки, бидејќи дојде до триумф благодарение на одличната игра во периодот од 40-та до 45-та минута кога од 21:21 направи серија од 5:0 за 26:21 и до крајот на натпреварот беше во предност, најчесто со два-три разлика.
На денешниот дуел во Автокоманда одлични во победничкиот тим беа Немања Џигероски со 12 и кадетскиот репрезентативец Бобан Поповски со десет погодоци, додека на спротивната страна искусниот Мице Шилегов имаше девет реализации.