По мини одморот, машката сениорска ракометна репрезентација се враќа на обврските – настапот на Европското првенство 2026, кое ќе се одржи во Данска, Норвешка и Шведска.
Селекторот Кирил Лазаров и неговите избраници денеска ќе го имаат првиот тренинг во новата 2026 година, а Македонија подготовките ги продолжува во комплетен состав.
Откако го пропушти првиот дел од подготовките поради клупски обврски, голманот Мартин Томовски им се приклучува на „црвено-жолтите“.
Во Скопје ќе се тренира неколку дена, а потоа Македонија заминува на турнир во швајцарскиот град Винтертур, каде што од 8 до 10 јануари ќе одигра пријателски натпревари со домаќинот Швајцарија, како и со селекциите на Украина и Бахреин.
По тест натпреварите, следува пат за Хернинг, каде што најверојатно ќе биде одигран уште еден пријателски дуел со дански клуб. Македонија на Европското првенство ќе настапи во група со Данска, Португалија и незгодната Романија.
Распоред на натпревари:
16 јануари, 20:30, Данска – Македонија
18 јануари, 18:00, Македонија – Португалија
20 јануари, 18:00, Македонија – Романија
Денеска ќе се соберат и кадетите, кои ќе одиграат два пријателски натпревари со Црна Гора. Селекторот Горан Кузманоски за овој собир повика 18 играчи. Исто како и Македонија, репрезентацијата на Црна Гора се пласираше на Европското кадетско првенство во Србија, па така избраниците на Кузманоски ќе имаат квалитетна проверка.