Ракометната федерација на Македонија (РФМ) планира организирање турнирски натпреварувања за помлади пионер(к)и до 13 години – деца родени во 2014 и 2015 година.
Првиот турнир е предвидено да се одржи на 31 октомври во Скопје, по што активностите треба да продолжат и во други градови низ Македонија.
РФМ ги повика заинтересираните клубови да ги пријават своите екипи и да достават податоци за бројот на деца по генерација, најдоцна до 21 октомври.
Дополнително, домашната ракометна куќа планира активности и турнири во мини ракомет за децата родени во 2016 година и помлади.
Целото соопштение во продолжение…
СООПШТЕНИЕ ДО РАКОМЕТНИТЕ КЛУБОВИ
Почитувани,
Ракометната федерација на Македонија, со цел поттикнување на развојот и популаризацијата на ракометот кај најмладите категории, планира организирање на турнирски натпреварувања во категоријата помлади пионери У13, за деца родени во 2014 и 2015 година.
Во таа насока, ги повикуваме сите заинтересирани ракометни клубови најдоцна до среда, 21.10.2026 година, да достават пријава со следните информации:
* Назив на ракометниот клуб;
* Број на екипи со кои клубот планира да учествува;
* Број на деца по генерација У13 (2014 и 2015 година) (со име и презиме и датум на раѓање)
* Јасно наведување дали станува збор за машки или женски екипи, со посебно прикажан број на деца за секоја категорија.
Првиот турнир е планирано да се одржи на 31.10.2026 година во Скопје, по што е предвидено натпреварувањата да продолжат со организација на турнири и во други градови низ Македонија.
Дополнително, со цел создавање услови за вклучување и на најмладите ракометари, ги повикуваме клубовите да достават информации и за бројот на деца родени во 2016 година и помлади, кои би биле заинтересирани за учество во активности и турнири во категоријата мини ракомет. И за оваа категорија потребно е одделно да се наведе бројот на машки и женски деца.
Пријавите потребно е да се достават најдоцна до 21.10.2026 година на следните електронски адреси:
До (To): handball@macedonianhandball.com.mk
Копија (CC): mirkulovski@macedonianhandball.com.mk и ivan_iosifovski@outlook.com
Врз основа на доставените пријави, Ракометната федерација на Македонија ќе пристапи кон утврдување на форматот, распоредот и начинот на организација на натпреварувањата, за што клубовите ќе бидат дополнително известени.
Веруваме дека преку ваквиот начин на натпреварување ќе овозможиме поголема вклученост на децата, стекнување натпреварувачко искуство и создавање позитивна спортска атмосфера, со што заеднички ќе придонесеме за развојот на младинскиот ракомет во Македонија.
Со почит,
Ракометна Федерација на Македонија