Ресен и оваа година покажа дека споменот на своите ракометни легенди живее. Во спортската сала „Зоран Стојановски“ по петти пат се одржа традиционалниот меморијален настан под мотото „РК Преспа за Зоки, Були и Котле“, посветен на Зоран Стојановски – Зоки, Булент Ибрахим – Були и Илче Котевски – Котле.
Меморијалниот настан уште еднаш ги обедини поранешните и сегашните ракометари, тренери, спортски работници и бројни љубители на ракометот од Ресен. Во рамки на настанот беше одигран традиционалниот ревијален натпревар, во кој силите ги одмерија ветерани и поранешни соиграчи на Зоки, Були и Котле против актуелниот тим на Преспа, засилен со ракометари кои денес настапуваат во Супер лигата, како и во клубови во странство, а во минатото го носеле дресот на ресенскиот клуб.
На паркетот повторно се најдоа бројни познати имиња, меѓу кои и актуелните ракометари – Ален Ќосевски, Бојан Поповски, Томче Трајчевски, Мартин Карапалевски, Горан Крстевски, Ласко Андоновски…
Во рамки на меморијалниот настан беа упатени специјални честитки до Владо Недановски, како и до Дејан Кукуловски и Ален Ќосевски, кои минатата сезона со Охрид го освоија трофејот во ЕХФ Европскиот Куп.