Искусниот ракометар Симон Биркефелд реши на 34-годишна возраст да направи неочекуван трансфер во својата кариера.
Данецот, кој пет години го носеше дресот на Рибе Есбјерг, потпиша едногодишен договор со јапонскиот клуб Фукуи Блу Тандер.
Десниот бек, кој во својата интернационална кариера настапуваше за Мелсунген во Германија и Кристијанштад во Шведска, во изјава за „ДР Спортен“ откри дека неговата желба била да „доживее културен шок“, па затоа изборот паднал токму на Јапонија.
„Спомнав неколку различни странски лиги, и тоа не толку поради спортското ниво, туку повеќе за да доживеам културен шок. Веднаш реков дека Јапонија е на врвот од мојата листа. По природа сум многу љубопитен и долго време ја восхитувам јапонската култура, кујна и историја. А и ми требаше авантура по пет години ракомет и студии. Па кога мојот агент ја спомена можноста, веднаш прифатив“, изјави Биркефелд за „ДР Спортен“.
Биркефелдт во својата татковина беше дел и од Твис Холстебро и Архус.