Македонскиот шампион Еурофарм Пелистер ја прифати оставката на тренерот Бранислав Ангеловски по натпреварот против Алкалоид. Како што е познато, битолскиот тим во дерби дуелот од 8. коло од суперлигашката конкуренција беше поразен во Автокоманда со 32:25.
Веднаш по натпреварот Ангеловски поднесе оставка, а раководството на клубот реши тимот привремено да го води поранешниот селектор на Македонија, Звонко Шундовски. Искусниот стратег е дел од клубот како тим-менаџер и доволно ги познава сите ракометари. Еурофарм Пелистер преку социјалните мрежи информираше дека наскоро ќе биде именуван новиот тренер.
Битолскиот тим утре пред својата публика ќе се соочи со Веспрем во натпревар од 6. коло од Лигата на шампионите.