Екипата на Еурофарм Пелистер 2 ќе биде исклучително интересна за следење во претстојната сезона, пред сè поради засилувањата кои пристигнаа во Битола. Вториот тим на битолчани денеска ги означи подготовките, а во „двојката“ има четири нови имиња.
Тоа се Марко Трајков (Пролет), Божидар Илиески (Прилеп), Кристијан Симоноски (Алкалоид) и Александар Стојков (Куманово), а во стручниот штаб на новиот тренер Бранислав Ангеловски ќе бидат Фарук Мемиќ (асистент тренер), Васко Димитровски (кондиционен тренер), Филип Ивановски (тренер на голмани) и Иванчо Тодоровски (физиотерапевт).
Тимот, предводен од Ангеловски, во новите предизвици ќе се потпре и на богатото искуство на Стефан Дрогришки. Искусниот ракометар како капитен пред една сезона го врати Еурофарм Пелистер 2 во Супер лигата, а со своето богато искуство, во кое има и настапи во Лигата на шампионите, ќе биде еден од лидерите на младата битолска екипа и во претстојната сезона.
Битолскиот состав е редовен учесник во суперлигашкото друштво уште од сезона 2020/21. Единствен исклучок беше натпреварувачката сезона 2024/25, кога тимот настапуваше во Првата лига. Сепак, таа епизода заврши со доминација – Еурофарм Пелистер 2 го освои првото место без ниту еден загубен бод, експресно обезбедувајќи го враќањето таму каде што припаѓа.
Со оглед на новите засилувања и стабилната структура, помладиот битолски суперлигаш во новата сезона влегува со аспирации за подобар пласман од изминатата сезона.