Ракометарите на Вардар го освоија трофејот на турнирот „Крсте Андоновски“ во Охрид, откако во финалето славеа над градскиот ривал, тимот на Алкалоид со 25:23 (15:9). Во натпревар, во кој двете екипи играа променливо, избраниците на Владо Недановски по одличното прво полувреме попуштија во вториот дел, но „сино-белите“ од Автокоманда немаа сили за целосен камбек во финалниот дуел. Најефикасен во вардаровиот табор беше Дмитро Горига со седум погодоци, исто толку постигна и Никола Костески во поразениот тим.
По финалниот натпревар беа избрани и најдобрите, па така индивидуалните награди завршија во редовите на „црвено-црните. Токму Горига беше прогласен за МВП на турнирот, додека голманот Мигел Еспиња, кој исто така имаше голема заслуга за освоениот трофеј на Вардар, ја освои наградата за најдобар голман.
