Денеска ќе започне новата сезона во Лигата на Европа, во која претставник на Македонија ќе биде Вардар. Избраниците на Владо Недановски во групната фаза ќе играат против Порто, Мелсунген и Валур, а прв ривал на „црвено-црните“ ќе биде исландскиот Валур, кој во својот состав има млади и искусни ракометари. Најзвучни имиња во тимот од Исланд се голманот Бјоргвин Густавсон и десниот бек Александар Петерсон. Голем хендикеп за Вардар на денешниот натпревар ќе биде отсуството на левиот бек Дмитро Горига.
Како што е познато, ракометарот од Украина ќе биде надвор од терените, бидејќи заработи тешка повреда на шутерската рака. Тренерот Недановски на левата бековска позиција ќе може да смета на Стефан Петриќ, Матија Николиќ и Вуко Борозан.
Натпреварот меѓу Вардар и Валур ќе се одигра денеска во СЦ „Јане Сандански“, со почеток во 20:45 часот.