Женската сениорска ракометна репрезентација на Македонија славеше против Белгија во Куманово со 33:28 во рамките од 4. коло од квалификациите за пласман на Европското првенство 2026, со што си ги задржа шансите да игра на осмо ЕП.
Фактор што ја правеше разликата беше голманката Андреа Илиќ. Вардарката бранеше голем дел од натпреварот, а со своите интервенции, од кои повеќето беа во дуели еден на еден, успеа да ја одржи предноста на македонската селекција и да им даде дополнителна сигурност на соиграчките, особено во моментите кога Македонија се одлепуваше на повисока разлика од два-три гола.
Во целата средба успеа да одбрани 14 шута на противничките, што беше клучно за конечниот резултат. Илиќ и во првата пресметка со Белгија на 4 март беше одлична и го покажа својот квалитет, иако влезе како замена.
Голманката во репрезентацијата работи под палката на екс‑репрезентативката Тања Андрејева додека на клупско ниво своите вештини ги усовршува со Александра Кузмановска.
Во последните две сезони, на клупско ниво, Илиќ покажува сериозен напредок, што го потврди и со репрезентативниот повик.