Репрезентативецот на Украина, Игор Турченко, син на некогашниот македонски репрезентативец Сергеј Турченко, повторно блеска на европската сцена. 24-годишниот лев бек веќе втора сезона го носи дресот на еден од најдобрите француски клубови – Лимож, а пред два дена со тимот обезбеди пласман во четвртфиналето на Лигата на Европа.
Лимож во осминафиналето се соочи со Луцерн, загуби на првиот натпревар (36:29), но на реваншот триумфираше со 36:28 и обезбеди место меѓу осумте најдобри екипи во второто по ранг европско клупско натпреварување.
Токму Турченко беше клучниот играч на реваншот, постигнувајќи 11 погодоци од 16 обиди, а зад своето име запиша и неколку асистенции.
Украинецот моментално е втор најдобар стрелец во Лигата на Европа, со 82 погодоци од 115 обиди (71,3% реализација). Во сезоната 2022/23, кога беше дел од Мотор Запорожје, постигна 97 погодоци на 14 натпревари. Тогаш Мотор беше еден од ривалите на Еурофарм Пелистер во групната фаза од Лигата на Европа.
Освен што се истакнува на европско ниво, Турченко има солидна сезона и во францускиот шампионат, каде што моментално е седми на листата на најдобри стрелци со 108 погодоци.
Во сезоната 2022/23, настапувајќи со Мотор Запорожје во Втората Бундес лига, Турченко го привлече вниманието на многу клубови, а неговиот квалитет беше препознаен од Лимож, кој не се двоумеше да го ангажира како засилување
Неговиот татко, Сергеј Турченко, долги години играше за Богданци, а подоцна настапуваше и за Борец Тедико и Климент Охридски. Другиот син на Сергеј, Дмитри, своевремено беше дел од Прилеп.
