Македонската кошаркарска федерација вчера се огласи со соопштение за инцидентот кој се случи на (не) пријателскиот натпревар помеѓу екипите на ТФТ и Чаир 2030, во салата на СРЦ „Кале“ во Скопје, кој беше прекинат од страна на официјалните лица поради општа тепачка. Како што е познато, во тешачката учествуваа играчи на ТФТ и навивачи на Чаир. Инцидентот се случил на две минути пред крајот од натпреварот кога клупата на Чаир реагирала по еден жесток старт на кошаркар на ТФТ, по што се вмешале и навивачите на чаирачани. Според информациите, подебелиот крај го извлекол кошаркарот и капитен на ТФТ, Едис Нури, кој бил нападнат од неколку лица.
,,Македонската кошаркарска федерација ќе ги преземе сите мерки, и ќе изрече соодветни казни за актерите во инцидентот кој се случи вечерва на пријателскиот натпревар помеѓу екипите на ТФТ и Чаир 2030, во салата на СРЦ „Кале“ во Скопје, кој беше прекинат од страна на официјалните лица.
За таа цел, согласно со првичните информации, комесарот за натпреварување, Александар Милојевиќ, од актерите, односно од претставниците на двата клуба, побара во текот на утрешниот ден да му достават изјави за инцидентот, односно причините за прекинатиот натпревар.
Освен тоа свое видување во писмена форма ќе дадат и официјалните лица (судиите и делегатот на натпреварот), по што ќе бидат донесени соодветни одлуки.
По втор пат за кратко време, во подготвителниот период, пред почетокот на новата натпреварувачка сезона, екипата на Чаир 2030 е учесник на натпревар во кој се случуваат работи кои немаат ништо заедничко со кошаркарската игра”, стои во соопштението на КФМ.