Малку недостасуваше кавадаречки Тиквеш да приреди изненадување во домашната ракометна Супер лига и да му ја сопре перфектната серија на Алкалоид. Во натпревар со два сосема различни дела, тимот на Лазаров на крајот сепак се радуваше на минимален триумф од 31-30.
Работите на теренот долго време одеа во корист на домаќините. Алкалоид уште од самиот старт го наметна својот ритам, заминувајќи на пауза со предност од три гола (18-15), а меѓу стрелците во првиот дел се запиша и голманот, кадетскиот репрезентативец Ѓорѓи Николовски.
При водство на Алкалоид од 28-23 на десет минути пред крајот, сè укажуваше на рутинско одработување во последниот дел, но гостите од Кавадарци се погрижија за вистинска драма, израмнувајќи на 30-30.
Искусниот Никола Костески погоди за 31-30, резултат со кој и заврши натпреварот. Алкалоид успеа да се одбрани во последниот напад, односно имаше и повеќе среќа, бидејќи ударот на Тоше Ончев во последните секунди можеше лесно да заврши во мрежата на Галевски.