Ракометарките на Овче Поле Славјански Универзитет последното коло за календарската 2026 година го заокружија со победа, откако на гостувањето во Скопје славеа кај младиот тим на Шампион со 40:21 (20:9)
Со денешните два бода, клубот од Свети Николе го завршува првиот дел од сезоната на првото место на табелата, со биланс од седум победи и едно реми, она на гостински терен кај Гевгелија Југ.
Поранешниот суперлигаш останува на лидерското место и сега има 15 бода, два повеќе од Гевгелија Југ, која во 9. коло беше подобра од Струга со 38:31.
Гостинската екипа беше предводена од Анастасија Сентовска, која постигна 18 погодоци, додека во домашниот табор пет ракометарки имаа по четири реализации (Евгенија Бошковска, Бојана Божиновска, Христина Трајанова, Миа Петровска и Ана Ристевска).