По пауза од речиси седум години, градот на ,,конзулите” ќе биде домаќин на натпревар од репрезентативен карактер. Откако на 25 октомври 2018 година, машката селекција играше и победи против Турција во квалификациите за ЕП 2020, сега Битола ќе ја пречека и женската репрезентација.
Ракометарките на Македонија на 12 април во спортската сала „Боро Чурлевски“ против Полска ќе го одиграат реванш дуелот од баражот за пласман на Светското првенство во Холандија и Германија. Како што е познато, Македонија последното учество на Мундијалите го имаше во Франција (2007). Се очекува избраничките на Кристијан Грчевски да имаат голема поддршка од битолчани.