Актуелниот шампион МЗТ Скопје доживеа неочекуван пораз во домашното првенство, откако на гостувањето во Гевгелија беше совладан од Кожув со 88-80 во натпревар од 20-то коло.
Домаќините уште од самиот старт најавија дека ќе бидат сериозен противник. Првата четвртина ја добија со 24-21, а иако разликата не беше голема, Кожув повеќе ја посакуваше победата.
Решавачкиот момент се случи во третиот период, кога домаќинот направи серија и во еден момент стигна до двоцифрена предност од +11. МЗТ Скопје, кој настапи без неколку клучни играчи, немаше одговор на налетот на Кожув, па разликата дополнително се зголемуваше.
Во последната четвртина, тимот на Кожув дојде и до највисоки +13, но гостите не се предадоа, се обидоа да се вратат во игра, создадоа неколку шанси за пресврт, но не реализираа во клучните моменти, што домаќините знаеа тоа да го казнат и да обезбедат победа, за нив11-та во досегашниот тек од сезоната.
Најефикасен во победничкиот тим беше Пурвис со 24 поени, 16 имаше Брајан Ламар Боувен, а со 14 поени заврши Никола Бојчев. Кај МЗТ Скопје се издвои Мекејден со 18 поени.