Во текот на вчерашниот ден беа одиграни четири натпревари од 23. коло во Првата лига, а на победа се радуваше тимот на Текстилец, кој пред својата публика славеше над Јехона од Гостивар со 42:35 (19:16). Штипјани со освоените бодови го зголемија своето салдо на 22 и останаа во игра за пласман во ТОП 6.
Во моментов се на шестата позиција, а во последните три кола ги очекуваат дуели против Мулти Есенс, Драчево Јуниор и Шампион. На натпреварот против Јехона, повторно во одлично светло се покажа талентираниот голман Кристијан Станчев, кој запиша дури 17 одбрани, но и се впиша во листата на стрелци, откако во 38. минута, по фантастична интервенција, успеа да погоди на празен гол.
ВИДЕО
Станчев блескаше и во претходното коло против амбициозниот Младост Богданци, кога исто така имаше 17 одбрани, што дополнително потврди дека Текстилец добива сериозен потенцијал за во иднина.
Талентираниот голман е дел и од кадетскиот тим на Текстилец, а на последните два натпревари од Првата лига доби целосна минутажа од тренерот Бобан Попов за да го покаже својот потенцијал.
Напаѓачки против Јехона се истакна Лазар Стојанов со осум погодоци, како и Јован Атанасовски и Филип Џинес, двајцата имаа по седум погодоци. Во поразениот табор, искусниот Адис Салиу имаше осум успешни реализации.